Mercan unha vivenda sobre plano co compromiso de entrega en abril do 2007, e aínda seguen agardando

En xuño do 2005 mercamos unha segunda residencia sobre plano e asinamos un contrato de compravenda no que figuraba como data de fin de obra xaneiro do 2007 e que a entrega se realizaría en abril. Aínda non nos deron as chaves e a promotora fai responsable ao Concello dun problema de subministración de enerxía que impide a concesión da licenza de ocupación, aínda que a obra xa está rematada. Querería saber se teño dereito a reclamar unha indemnización polo atraso. Tamén aparece no contrato que a plusvalía a temos que pagar nós. Podémonos negar?

A data de entrega debe cumprirse, e non se pode deixar ao arbitrio do vendedor, salvo que este xustifique o atraso por imposibilidade derivada de forza maior ou caso fortuíto. É dicir, non todo atraso representa incumprimento contractual; en ocasións pode estar xustificado. Como a vendedora alega problemas para a concesión da licenza de primeira ocupación non imputables a ela, senón ao Concello, o comprador debe coñecer se a vivenda se adecuou ou non ao proxecto orixinario, os motivos exactos da denegación da licenza de primeira ocupación, a data de fin de obra e a data en que a construtora pediu a licenza de primeira ocupación. A persoa afectada débelle solicitar, polo tanto, máis información ao Concello e á construtora. A partir de aí poderán valorar a dilixencia ou neglixencia da construtora e reclamar unha indemnización por atraso, cantidade que podería servir para compensar os gastos xerados polo alugueiro doutra vivenda para pasar as súas vacacións e outros que poidan acreditar. No tocante á plusvalía, o novo texto refundido da Lei do consumidor imponlle este gasto ao vendedor.

Relacións deste contido

Información de Copyright e aviso legal

En CONSUMER EROSKI tomámosnos moi en serio a privacidad dos teus datos, aviso legal. © Fundación EROSKI