Tras dúas reparacións no móbil, o vendedor non quere ofrecer un de substitución

Merquei un móbil nunha tenda á que tiven que regresar ao día seguinte para que me cambiasen o cargador porque facía ruído. Días despois xurdiron outros inconvenientes e tiveron que cambiar a batería. Pero os meus problemas continuaron porque as conversas a través do móbil apenas se escoitaban, así que volvín á tenda esixindo unha solución. A pesar de que non pasaran nin sete días, explicáronme que non me podían dar outro móbil. Gustaríame saber se teño dereito a esixir un móbil mentres estean a reparar o meu, xa que paguei moitos cartos por un artigo que non podo utilizar.

O Real Decreto Lexislativo 1/2007, que aproba o texto refundido da Lei xeral para a defensa dos consumidores e usuarios e outras leis complementarias, imponlle ao vendedor a obriga de responder das avarías e defectos dos produtos nun prazo de dous anos dende o momento da entrega, rexistrada na factura, tícket de compra, ou albará, de xeito que ao consumidor abóndalle con amosar esta factura para lle reclamar ao vendedor os dereitos que a lei lle outorga. Segundo a lei, ante un defecto do produto, o consumidor poderá optar entre a reparación e a substitución por outro novo, debendo elixir a menos custosa para o vendedor sempre que sexa viable. Ademais, o cliente ten dereito a esixir a substitución do obxecto por outro unha vez que sexa reparado e persista a avaría, así como á devolución ou a súa rebaixa. Se a garantía comercial concede dereito a un móbil de substitución, pódese esixir a través dunha folla de reclamacións. No caso contrario, tamén se pode reclamar. A persoa afectada pode alegar cuestións de necesidade e indicar que, dados os graves inconvenientes que lle está ocasionando permanecer sen móbil, reclama a devolución do prezo pagado ou un móbil novo a cambio de que o establecemento quede co móbil avariado, e máis se se atopa xa na terceira reparación. Para iso debe acudir aos servizos de información ao consumidor.

Relacións deste contido

Información de Copyright e aviso legal

En CONSUMER EROSKI tomámosnos moi en serio a privacidad dos teus datos, aviso legal. © Fundación EROSKI