Eraikinaren beheko solairuan dauden soltokiek beren solairuko fatxadari dagozkion gastuak soilik ordaindu behar dituzte

Etxejabeen elkartean erabaki genuen beheko solairuan saltokiren bat dugunok gure solairuko fatxadari dagozkion gastuak ordainduko ditugula, eta beste fatxada guztien gastuak, gainerako etxejabeek ordainduko dituztela. Duela gutxi lotu ditugu fatxada berritzeko lanak, eta horiek hasita zeudela, ezohiko batzarra egin dugu etxejabeok, eta teilatua ere konpontzea erabaki dugu, aldamioak behin jarrita daudenez, horri probetxu ateratzeko. Aurrekontua, beraz, handitu egin da, eta hortik sortu zaizkigu desadostasunak. Saltokiek zer ordaindu behar dute, teilatuko lanei soilik dagokien zatia, edo aldamioari eta lanen zuzendaritzari dagozkionak ere ordaindu behar dituzte?

Jabetza Horizontalaren Legeak esaten du guztiek erabiltzen duten elementu bat berritzeko eta mantentzeko egin behar diren lanak (fatxada berritzea, adibidez) etxejabe guztien artean ordaintzekoak direla, eta bakoitzak dagokion portzentajea jarri behar duela. Beheko solairuko saltokien jabeak ere hor sartzen dira. Zuek, ordea, erabaki zenuten gastuak beste modu batera banatzea, eta erabaki horrek badu balioa lege ikuspuntutik, eta horri heldu beharko diozue interes gatazka hau konpontzeko, edo, bestela, beste erabaki bat hartu beharko duzue, aho batez berriz ere. Teilatuari dagozkion gastuak soilik ordaindu behar lituzkete saltokiek, hala erabaki zenutelako batzarrean. Eta ongi erabakia dago hori, guztiei egiten baitie mesede, ez soilik saltokien jabeei. Zuen arteko jarrerak hurbiltzeko, beste batzar batera dei ditzakezue etxejabe guztiak, eta bere garaian zer erabaki zenuten ikusi eta hitzez hitz esaten duena bete. Ez bazenute lortuko guztiak ados jartzea, bitartekari edo arbitraje zerbitzu batera jo dezakezue (zuen erkidegoko etxebizitza zerbitzu publikoak izango du).

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du

Copyright-i buruzko informazioa eta lege-oharra

 CONSUMER EROSKIn zure datuen pribatutasuna oso garrantzitsutzat jotzen dugu, lege oharra. © EROSKI Fundazioa