Bizilagunaren autoa ez da sartzen bere aparkalekuan, eta gainerakoei traba egiten die

Etxejabeen elkartekoek garajea dugu bakoitzak gure autoa uzteko, baina bizilagun bati autoa ez zaio sartzen aparkalekuan, eta besteoi traba egiten digu. Zer egin dezaket? Administratzaileak jakinaren gainean jarri du, baina ez dio kasurik egiten, berak ezin omen du ezertxo ere egin. Nire autoak kolperen bat hartuko duen beldur naiz.

Etxejabeen elkarteak, Kodearen 394. artikuluan esaten du kide edo jabe bakoitzak erabil ditzakeela guztientzat diren eremuak, betiere halakoak egoki erabiltzen baditu, gainerako jabeen eskubiderik urratzen ez badu eta haien interesei kalterik egiten ez badie. Garaje batek baditu eremu batzuk guztiek erabiltzekoak, eta gutako bakoitzak horiek erabil ditzakegu autoarekin pasatzeko, ibiltzeko eta maniobrak egiteko, baina ez autoa horietan aparkatzeko. Zure bizilaguna, beraz, desegoki erabiltzen ari da guztientzako diren eremuak. Eta, gainera, kalte egiten die beste jabeei. Erabilera-muga gainditzea eta kalte egitea da hori, eta Zuzenbideak ez du halakorik onartzen. Zer egin? Administratzailearengana jo dezakezue, eta eskatu gai hori sar dezala etxejabeen hurrengo batzarrerako gai zerrendan, bizilagunak ez dezan jarraitu oker erabiltzen guztientzat diren eremuak. Azken batean, ez da egia bizilagunak ezin duela "ezertxo ere" egin: daukan ibilgailua sal dezake, eta txikiagoa erosi, edo, bestela, beste aparkaleku batean utz dezake. Denbora baten buruan berdin jarraitzen badu, epaitegira joatea da onena, bide zibiletik. Han behartuko dute garajea behar bezala erabiltzera: ezin ditu gainditu aparkalekuko muga-marrak, ezta oztopatu ere guztiok erabiltzeko diren eremuak (autoarekin pasatzeko, ibiltzeko eta maniobrak egiteko erabiltzen direnak). Etxejabeen Batzarrak hala nahi badu, etxejabeen elkarteak jar dezake salaketa, edo, bestela, kalteak jasan dituzten jabeek. Epaitegira joateko asmoa baduzue, komeni da aditu batek txostena egin dezan, epaileari erakusteko bizilagun horrek egiaz kalteak eragin dituela.

Eduki honen erlazioak

Ekintza honek Bizkaiko Foru Aldundiaren Kultura Sailaren laguntza jaso du

Copyright-i buruzko informazioa eta lege-oharra

 CONSUMER EROSKIn zure datuen pribatutasuna oso garrantzitsutzat jotzen dugu, lege oharra. © EROSKI Fundazioa