Instalar chemineas molestas require a aprobación da Xunta

Vivo nun primeiro andar situado enriba dunhas terrazas que se corresponden co teito duns locais comerciais. Nun destes locais atópase unha panadería, que instalou unha cheminea duns 75 centímetros de altura na devandita terraza. Esta cheminea bota fume practicamente durante as vintecatro horas do día e, como consecuencia, as vivendas que quedan enriba vense afectadas, ata o punto de que case non se pode abri-las ventás. A miña pregunta: ¿é legal que unha cheminea destas características estea instalada nesas condicións e botando fume case todo o día? ¿Pódese tomar algunha medida?

A instalación dunha cheminea para a saída de fumes nun elemento común do edificio, alterando a súa configuración e ocasionando, ademais, danos ós veciños, require, conforme ó artigo 12 e 17 da nova Lei de Propiedade Horizontal, o acordo unánime da Xunta de propietarios. Se non chegan a un acordo co propietario do local para solucionar este conflicto, poderían adoptar medidas xudiciais, instando a levar a cabo o derrubamento da cheminea. Para iso pódese convocar unha Xunta Extraordinaria de propietarios que inclúa na orde do día este asunto, coa fin de requirirlle posteriormente ó dono da panadería que retire a cheminea e informándoo de que, no caso contrario, a comunidade procederá a actuar pola vía xudicial. Para iso, a Xunta debería autoriza-lo presidente a iniciar accións legais. Para iso convén enviarlle unha carta ó presidente da comunidade informándoo dos feitos e solicitándolle que convoque a Xunta Extraordinaria. Tamén procede neste caso informarse no Concello sobre as licencias das que dispón (ou carece) o dono do local que lles causa o problema ós veciños. Esta información solicítase primeiro verbalmente e, se interesa, tamén se pode facer por escrito a través do Rexistro Xeral do Concello.

Relacións deste contido

Información de Copyright e aviso legal

En CONSUMER EROSKI tomámosnos moi en serio a privacidad dos teus datos, aviso legal. © Fundación EROSKI